Bu gün, fevralın 5-də jurnalist Şahnaz Bəylərqızı da saxlanıb. Yaxınlarının bildirməsinə görə, onun Bakı şəhərindəki mənzilində də axtarış aparılıb.

Hələlik, baş verənlərə Azərbaycanın rəsmi qurumlarından münasibət almaq mümkün olmayıb.

Jurnalist Şəmşad Ağa saxlanıb

Fevralın 4-dən 5-nə keçən gecə arqument.az saytın baş redaktoru, jurnalist Şəmşad Ağa (Ağayev) saxlanıb.

Jurnalistin yaxınları deyir ki, gecə saat 2-də onun Bakı şəhərində yaşadığı evdə axtarış aparılıb: "Şəmşadın köhnə telefonunu, kompüteri, modemi, jurnalist vəsiqələrini götürüblər".

Vəkil Şəhla Hümbətova bildirib ki, Ş.Ağa "MeydanTV işi" üzrə Cinayət Məcəlləsinin 206.3.2-ci (qaçaqmalçılıq — qabaqcadan əlbir olan bir qrup şəxs tərəfindən törədildikdə) maddəsi ilə şübhəli şəxs qismində saxlanılıb.

Hələlik, onun saxlanması xəbərinə rəsmi qurumlardan münasibət almaq mümkün olmayıb.

"MeydanTV işi" üzrə ötən il dekabrın 6-da altı jurnalist - Aynur Elgünəş, Xəyalə Ağayeva, Aytac Tapdıq, Aysel Umudova, Natiq Cavadlı və Ramin Cəbrayılzadə (Deko) saxlanılıb. Onların hər biri barəsində Cinayət Məcəlləsinin 206.3.2-ci (qaçaqmalçılıq — qabaqcadan əlbir olan bir qrup şəxs tərəfindən törədildikdə) maddəsi ilə ittiham irəli sürülüb və 4 aylıq həbs-qətimkan tədbiri seçilib.

Ümumilikdə 2023-cü ilin noyabrından başlayaraq Azərbaycanda qruplar halında 30 civarında jurnalist, ictimai fəal qaçaqmalçılıq ittihamı ilə həbs edilib. Amma onların hamısı ittihamla razılaşmır, bunu peşə fəaliyyətləri və siyasi sifariş ilə izah edirlər. Sonradan onlardan bir çoxunun ittihamı ağırlaşdırılıb.

Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında 300-dən çox siyasi məhbus var. Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslar ilə həbs edilmir. Onların deməsinə görə, həmin siyahılarda yer alanlar sırf törətdikləri əmələ görə məsuliyyətə cəlb ediliblər.

Muxtar Babayev Azərbaycanın ekologiya və təbii sərvətlər naziri vəzifəsindən azad edilib.

Prezident İlham Əliyev bununla bağlı bu gün, fevralın 5-də Sərəncam imzalayıb.

O bu vəzifəni 2018-ci il aprelin 23-dən tuturdu.

Prezidentin başqa bir sərəncamı ilə M.Babayev Azərbaycan Respublikası Prezidentinin iqlim məsələləri üzrə nümayəndəsi təyin edilib.

Legitimliyi beşinci prezident Salome Zurabişvili, müxalifət və Gürcüstan ictimaiyyətinin əhəmiyyətli bir hissəsi tərəfindən tanınmayan Gürcüstan parlamenti 49 deputatın səlahiyyətlərinə xitam verib. Belə ki "Birlik – Milli Hərəkat", "Dəyişiklik uğrunda Koalisiya" və "Güclü Gürcüstan" partiyalarının üzvlərinin mandatlarına son verilib. Müvafiq qərarın qəbul edilməsinə deputatların ötən ilin noyabrında mandatlarının ləğvi ilə bağlı parlamentə müraciət etməsi səbəb olub.

İndiki mərhələdə sabiq baş nazir Giorgi Qaxariyanın "Gürcüstan Naminə" partiyası 12 mandatla parlamentdə qalır. Qaxariyanın partiyası, 2024-cü il oktyabrın 26-da keçirilən seçkilərdə seçki baryerini aşan digər partiyalar kimi, səsvermənin nəticələrini "qeyri-legitim" adlandırır və parlament fəaliyyətində iştirak etmir. Lakin partiyanın təmsilçiləri deputat mandatlarına son verilməsi üçün ərizə ilə müraciət etməyiblər.

Gürcüstan Mərkəzi Seçki Komissiyasının yekun protokoluna əsasən, 2024-cü il parlament seçkilərinin nəticələrinə görə, "Güclü Gürcüstan" 14, "Dəyişiklik uğrunda Koalisiya" 19, "Birlik – Milli Hərəkat" isə 16 mandat alıb.

Bu partiyaların təmsilçiləri 2024-cü ilin noyabr və dekabr aylarında parlament üzvü kimi səlahiyyətlərinə vaxtından əvvəl xitam verilməsini tələb edən bəyanatlar yazmışdılar.

2024-cü ilin noyabrından bəri Gürcüstanda yeni parlament seçkiləri tələbi ilə etirazlar keçirilir.

Azərbaycan Ukraynaya humanitar yardım məqsədilə 1 milyon ABŞ dolları vəsait ayırıb.

AZƏRTAC-ın xəbərinə görə, prezident İlham Əliyev bununla bağlı sərəncam imzalayıb.

Sərəncama əsasən, həmin məqsədlə Azərbaycan Prezidentinin ehtiyat fondundan Energetika Nazirliyinə 1 milyon ABŞ dollarının manat ekvivalentində vəsait ayrılmalıdır.

Azərbaycan bundan əvvəl də Ukraynaya bir neçə dəfə humanitar yardımlar edib.

2022-ci il fevralın 24-də Rusiya Ukraynaya yenidən təcavüzə başlayıb. Doqquz il əvvəl də Rusiya Ukraynanın bir hissəsini-Krımı tutmuşdu. Onda Rusiyaya sanksiyalar tətbiq edilməyə başlanmışdı. Yeni müharibədən sonra Qərb və dünyanın bir sıra ölkələri Rusiyaya sanksiyaları genişləndirib. Amma Azərbaycan bu sanksiyalara qoşulmur. Bununla belə, Ukraynaya humanitar yardım göstərdiyini və onun ərazi bütövlüyünü tanıdığını açıqlayıb.

Başqa tərəfdən, 2022-ci il fevralın 22-də Moskvada "Azərbaycan Respublikası ilə Rusiya Federasiyası arasında müttəfiqlik qarşılıqlı fəaliyyəti haqqında Bəyannamə" imzalanıb. Bu sənəddə iki ölkə arasında siyasi, iqtisadi və daha bir çox sahələrdə əməkdaşlığın inkişaf etdirilməsindən bəhs olunur.

ABŞ prezidenti Donald Tramp ölkəsinin Birləşmiş Millətlər Təşkilatının (BMT) İnsan Hüquqları Şurasından çəkildiyini və BMT-nin fələstinli qaçqınlara yardım agentliyinə maliyyə dəstəyi ayırmayacağını bəyan edib.

Prezident Tramp fevralın 4-də İsrailin baş naziri Benyamin Netanyahu ilə Ağ evdə görüşdən əvvəl bununla bağlı müvafiq əmrlər imzalayıb.

İsrail BMT İnsan Hüquqları Şurası (UNHRC) və BMT-nin Fələstinli Qaçqınlara Yardım və İşlərin Təşkili üzrə Yaxın Şərq Agentliyini (UNRWA) İsrailə qarşı mənfi mövqedə və antisemitizmlə ittiham edir.

Əmrdə bildirilir ki, ABŞ İkinci Dünya müharibəsindən sonra gələcək qlobal münaqişələrin qarşısını almaq, beynəlxalq sülh və təhlükəsizliyin təşviqi məqsədilə BMT-nin yaradılmasına kömək edib. Lakin bəzi BMT agentlikləri "bu missiyadan uzaqlaşaraq, əksinə, Birləşmiş Ştatların maraqlarına zidd hərəkət edir, müttəfiqlərimizi hədəf alır və antisemitizmi təbliğ edir".

Trampın imzaladığı sənəddə o da deyilir ki, ABŞ BMT-nin Təhsil, Elm və Mədəniyyət Təşkilatındakı (UNESCO) üzvlüyünü də yenidən nəzərdən keçirəcək. Qeyd olunub ki, buna səbəb təşkilat daxilində islahatların aparılmaması, UNESCO-nun davamlı olaraq İsrailə qarşı mənfi mövqedə olması və artan borclarla bağlı narahatlıqlara düzgün yanaşmamasıdır.

Tramp bildirib ki, BMT-nin "böyük" potensialına əsaslanaraq ABŞ onunla birgə irəliləməyə davam edəcək, amma əlavə edib ki, BMT-nin əsas məqsədi münaqişələri çözmək olmalıdır.

BMT-nin fələstinlilərə yardım agentliyi (UNRWA) hazırda Qəzzadakı müharibədən qaçqın düşən 1.9 milyon insanı humanitar yardımla təmin edir. Bu yardımlar o insanlar üçün həyati əhəmiyyət daşıyır.

İsrail BMT-nin sözügedən agentliyinin 12 işçisini 2023-cü il oktyabrın 7-də HƏMAS hücumunda iştirakda ittiham etmişdi. Bundan sonra - 2024-cü ilin yanvarında prezident Bayden agentliyə maliyyə yardımlarını dayandırmışdı.

Tramp birinci prezidentlik dövründə də Birləşmiş Ştatları BMT-nin İnsan Hüquqları Şurasından geri çəkmişdi. Həmin dövrdə ölkənin BMT-dəki səfiri Nikki Heyli qurumu İsraillə qarşı davamlı qərəzdə ittiham etmiş və Şuranın üzvləri arasında insan hüquqları pozucularının olduğunu bildirmişdi.

Prezident Co Baydenin dövründə ölkənin BMT İnsan Hüquqları Şurasına iştirakı bərpa olunsa da, ötən ilin sentyabrında ABŞ-nin ikinci ardıcıl müddətə seçilmək üçün müraciət etməyəcəyi açıqlanmışdı.

Fevralın 4-də ABŞ prezidenti Donald Tramp İranın neft ixracına zərbə vurmaq və bu ölkənin nüvə proqramını ləngitmək məqsədilə "maksimum iqtisadi təzyiq" siyasətinin bərpasına dair sənəd imzalayıb.

İsrailin baş naziri Benyamin Netanyahunu Ağ evdə qəbul etməzdən əvvəl Tramp ilk prezidentlik dönəmində tətbiq etdiyi siyasətin bərpasına dair prezident memorandumunu imzalayıb.

Memorandum çərçivəsində Maliyyə və Dövlət Departamentlərinə İranın neft ixracını sıfıra endirməyə yönəlmiş kampaniyanın həyata keçirilməsi tapşırılır.

Memorandumu imzalayarkən Tramp bunu çox sərt bir addım kimi xarakterizə edib, lakin, eyni zamanda, İranla razılaşmaya açıq və İran rəhbərliyi ilə danışıqlara hazır olduğunu bildirib.

"Mənim üçün bu çox sadədir: İran nüvə silahına sahib ola bilməz", –Tramp vurğulayıb. Tehranın nüvə silahına nə qədər yaxın olduğu barədə sualı cavablandırarkən isə "Onlar həddindən artıq yaxındırlar", – deyə əlavə edib.

Tramp 2018-ci ildə İranın nüvə proqramını məhdudlaşdırmaq qarşılığında sanksiyaların yüngülləşdirilməsini nəzərdə tutan beynəlxalq sazişdən (JCPOA) Birləşmiş Ştatların çıxdığını elan edib və 2020-ci ildə İranın əsas generallarından birinin öldürülməsi barədə göstəriş verib.

Tramp İranla razılaşma əldə etmək istəyir

Fevralın 4-də İsrailin baş naziri Netanyahu ilə birgə mətbuat konfransında Tramp İranın sülh və uğur əldə etməsini istədiyini bildirib. O, iranlıları "inanılmaz bir xalq" olaraq tərif edib.

"Mən bunu çox diqqətlə dinləyən İran üçün deyirəm: Mən yaxşı bir razılaşma əldə etmək istərdim. Elə bir razılaşma ki, siz də həyatınıza davam edə biləsiniz", –Tramp mətbuat konfransında bildirib.

İranın Ali Dini rəhbəri Əli Xamenei ötən həftə sanksiyaların yüngülləşdirilməsi ümidi ilə Tramp administrasiyası ilə danışıqlara başlamağa razılıq verdiyini işarə edib. İranın Strateji İşlər üzrə vitse-prezidenti Məhəmməd Cavad Zərif isə daha əvvəl Trampı rasionallığı seçməyə və nüvə danışıqlarına yenidən başlamağa çağırıb.

Ukrayna prezidenti Volodimir Zelenski bəyan edib ki, ölkədə təxminən üç ildir davam edən müharibəyə son qoymaq üçün Rusiya prezidenti Vladimir Putinlə birbaşa danışıqlara gedə bilər. Lakin o, belə bir addımı yalnız Ukraynada sülhün təmin olunmasının yeganə yolu olduğu təqdirdə atacağını vurğulayıb.

Zelenski həmçinin Rusiyaya tətbiq olunmuş sanksiyaların ləğvinə qarşı xəbərdarlıq edib və Ukraynanın təhlükəsizlik zəmanətləri ilə bağlı ehtiyacına cavab olaraq nüvə silahları məsələsini gündəmə gətirib. Ukrayna prezidenti bu fikirləri fevralın 4-də britaniyalı jurnalist Pirs Morqana verdiyi müsahibədə səsləndirib.

Müharibənin dayandırılması ilə bağlı danışıqlara toxunan Ukrayna prezidenti Zelenski bildirib: "Əgər insanlar diplomatik yola keçməli olduğumuza inanırlarsa, mən də diplomatik prosesə hazır olduğumuza inanıram, bu danışıqlarda ABŞ, Avropa, Ukrayna və Rusiya iştirak etməlidir".

Putinlə danışıqlar masasında üz-üzə oturarkən keçirəcəyi hisslə bağlı sualı cavablandıran Zelenski: "Əgər bu, Ukrayna vətəndaşlarına sülh gətirə biləcəyimiz və insan itkisinin qarşısını ala biləcəyimiz yeganə formatdırsa, biz mütləq bu formata gedəcəyik. Ona qarşı mehriban olmayacağam, çünki onu düşmən hesab edirəm. Düzünü desəm, düşünürəm ki, o da məni düşmən kimi görür".

"Nüvə raketləri kömək edə bilər"

Müsahibədə Zelenski vurğulayıb ki, Rusiyaya qarşı sanksiyaların yumşaldılması ikinci bir işğal riskini artıracaq.

O, təhlükəsizlik zəmanətləri barədə sualı cavablandırarkən Ukraynanın nüvə silahına sahib olması ilə bağlı fikirlərini də səsləndirib. Zelenski qeyd edib ki, əgər Ukraynanın NATO-ya üzvlük prosesi illərlə, hətta onilliklərlə uzanarsa, ölkənin nüvə silahına malik olması Putinin yeni hücumuna qarşı yetərli təhlükəsizlik təminatı ola bilər.

O, eyni zamanda, vurğulayıb ki, Ukraynanın NATO-ya üzvlüklə bağlı yol xəritəsi hələ də Kiyevin müharibəni dayandırmaq və təhlükəsizlik zəmanətləri əldə etmək üçün üstünlük verdiyi yoldur. Lakin o, nüvə raketləri ilə bağlı məsələni qaldırmağın "tamamilə ədalətli" olduğunu bildirib.

"Onlar bizə elə bir sayda raket verəcəklərmi ki, biz Rusiyanı dayandıra bilək? Buna əmin deyiləm, amma düşünürəm ki, bu (nüvə raketləri), kömək edə bilər. Əks təqdirdə, Rusiyanın nüvə raketlərini hansı raketlər dayandıra bilər?", - Zelenski əlavə edib.

Ukrayna prezidenti Kiyevin döyüş meydanında Rusiya qüvvələrinin qarşısını almaqda çətinlik çəkdiyini də etiraf edib və Ukraynanın Rusiyanın tutduğu əraziləri geri almasının mümkün olmadığını vurğulayıb.

"Təəssüf ki, tərəfdaşlarımızın verdiyi dəstək Putini tam olaraq ərazilərimizdən çıxarmağa kifayət etmir", - Ukrayna dövlət başçısı əlavə edib.

Avropa İnsan Hüquqları Məhkəməsinin (AİHM) 2024-cü il üzrə illik hesabatı açıqlanıb. Hesabatda bildirilir ki, məhkəmədə baxılmasını gözləyən ərizələr (60350) hələ də çoxdur. Lakin bu, 2023-cü ilin sonu ilə müqayisədə 11.8 faiz azalıb. Baxılmasını gözləyən ərizələrin təxminən 2/3-si, əsasən, beş dövlətin payına düşür: Türkiyə (21600), Rusiya (8150), Ukrayna (7700), Rumıniya (3850) və Yunanıstan (2600).

Hesabatda AİHM-də ümumilikdə 14 dövlətlərarası işin olduğu da vurğulanıb. Bunlar sırasında Azərbaycanın da adı qeyd olunur. Azərbaycanın Ermənistana qarşı iki, Ermənistanın Azərbaycana qarşı dörd işi AİHM-dədir. Bunlarla yanaşı, Ukrayna və Gürcüstanın Rusiyaya, Ermənistanın Türkiyəyə qarşı qaldırdığı işlər də var.

2024-cü ildə icraata qəbul olunan ərizələrin sayı 28 min 800 olub. Azərbaycan üzrə bu rəqəm 600-dür. Hesabatda vurğulanır ki, bu, əvvəlki illərlə müqayisədə çoxdur. 2023-cü ildə bu göstərici 438, 2022-ci ildə 389 idi.

Əhalinin sayına nisbətdə 2024-cü ildə ən çox ərizə verilən ölkələr sırasında top beşliyə Xorvatiya (10 min nəfərə 2.27 ərizə) Monteneqro (1.80) Şimali Makedoniya, Sloveniya (1.80) və Serbiya (1.69) daxildir. Ötən il Azərbaycan üzrə bu göstərici 0.59 olub ki, bu da Avropanın 0.34-lük orta göstəricisindən yüksəkdir.

Ötən il AİHM-də Azərbaycan üzrə ümumilikdə 76 ərizə ilə bağlı qərar verilib. Hesabata görə, 39 ərizə üzrə məhkəmə hökmü çıxarılıb, 451 ərizə ya qəbuledilməz sayılıb, ya da icraatı dayandırılıb (2023-cü ildə 655 olub).

2024-cü ilin sonunda Azərbaycan üzrə AİHM-in icraatında gözləyən ərizələrin sayı 1968 olub (2023-cü ilin sonunda 1877 idi). Hesabatda vurğulanır ki, bu göstərici ilə Azərbaycan ilk 10 ölkə arasında yer alır.

Bu gün, fevralın 4-də Xətai rayon Məhkəməsində "MeydanTV işi" üzrə həbs edilən jurnalist Ramin Cəbrayılzadənin (Deko) ev dustaqlığına buraxılması ilə bağlı müdafiə tərəfinin vəsatətinə baxılıb.

Məhkəmə vəsatəti təmin etməyərək jurnalist haqqında qətimkan tədbirini dəyişməyib.

Müdafiə tərəfi qeyd edir ki, vəsatət üçün əsas istintaq hərəkətlərin aparılmaması olub.

"Həbs-qətimkan tədbirin özü də heç bir sübut, dəlil olmadan seçilib. Hazırda da heç bir istintaq hərəkəti aparılmır. Biz hesab edirik ki, belə olan halda Ramin Cəbrayılzadənin həbsdə qalması üçün heç bir əsas yoxdur. Təəssüf ki, məhkəmə vəsatətimizi təmin etməyib", - vəkil Nemət Kərimli vurğulayıb.

Vəkilin sözlərinə görə, məhkəmədə R.Deko həbsini jurnalist fəaliyyəti ilə əlaqələndirib.

R.Cəbrayılzadə ötən il dekabrın 6-da saxlanılıb. Həmin gün beş jurnalist - Aynur Elgünəş, Xəyalə Ağayeva, Aytac Tapdıq, Aysel Umudova, Natiq Cavadlı də saxlanılıb. Onların hər biri barəsində Cinayət Məcəlləsinin 206.3.2-ci (qaçaqmalçılıq — qabaqcadan əlbir olan bir qrup şəxs tərəfindən törədildikdə) maddəsi ilə ittiham irəli sürülüb və 4 aylıq həbs-qətimkan tədbiri seçilib.

30 yanvar

Aytac Əhmədovanın apellyasiya şikayəti təmin edilmədi

Yanvarın 30-da Bakı Apellyasiya Məhkəməsində "MeydanTV işi" üzrə həbs olunmuş jurnalist Aytac Əhmədovanın (Tapdıq) şikayətinə baxılıb.

Hakim Elbəyi Həsənovun sədrliyi ilə keçirilən prosesdə jurnalist barəsində seçilmiş həbs-qətimkan tədbirini ev dustaqlığı ilə əvəzlənməsi haqqında vəsatətin Xətai rayon Məhkəməsində təmin edilməməsi ilə bağlı qərardan şikayətə baxılıb.

Vəkil Cavad Cavadov bildirib ki, şikayət təmin edilməyib: "Aytac Tapdıq özü də məhkəmədə iştirak edib. O bildirdi ki, 10 ildən çoxdur MeydanTV ilə əməkdaşlıq edir və onun həbsi sırf jurnalist fəaliyyətinə görədir. Biz də hesab edirik ki, burada Avropa İnsan Hüquqları Konvensiyasının 18-ci (Hüquqlarla bağlı məhdudlaşdırmalardan istifadənin hədləri) maddəsinin pozuntusu açıq-aşkardır. Obyektiv əsaslar olsa da, istintaq və məhkəmələr onun barəsində həbslə bağlı olmayan qətimkan tədbiri seçmirlər".

Vəkil qeyd edib ki, məhkəmə qərarından Avropa İnsan Hüquqları Məhkəməsinə şikayət veriləcək.

24 yanvar

Jurnalist Aysel Umudova da evə buraxılmadı

"MeydanTV işi" üzrə həbs olunmuş jurnalist Aysel Umudova ev dustaqlığına buraxılmayıb.

Vəkil Aqil Layıc bildirib ki, A.Umudovanın ev dustaqlığına buraxılması ilə bağlı Xətai rayon Məhkəməsinə müraciət etmişdi və məhkəmə bu gün, yanvarın 24-də vəsatəti təmin etməyib: "Biz bilirdik ki, qərar belə olacaq. Sadəcə bu bir prosedurdur ki, Avropa İnsan Hüquqları Məhkəməsinə müraciət etməyimiz üçün ondan keçməliyik".

Müdafiə tərəfindən bildirildiyinə görə, A.Umudova məhkəməyə heç vaxt istintaqdan yayınmadığını, şahidlərə təsir etmədiyini deyib, ona görə də onu həbsdə saxlamağa əsas yoxdur: "O şərləndiyini bildirib, həbsini jurnalistika fəaliyyətinə bağlayır".

23 yanvar

Məhkəmə jurnalist Aytac Tapdığı da ev dustaqlığına köçürməkdən imtina edib

Yanvarın 23-də Bakının Xətai rayon Məhkəməsi MeydanTV ilə əməkdaşlıq etdiyi bildirilən jurnalist Aytac Tapdıqın ev dustaqlığına köçürülməsi haqqında vəsatəti təmin etməyib. Bu barədə vəkil Cavad Cavadov bildirib.

Müdafiə tərəfi hesab edir ki, jurnalistin həbsdə saxlanması üçün əsas yoxdur, ona qarşı irəli sürülmüş qaçaqmalçılıq ittihamları uydurmadır.

A.Tapdıq özü jurnalist fəaliyyətinə görə təqib edildiyini bildirib. Müdafiə tərəfi jurnalisti ev dustaqlığına və ya girov əvəzində azadlığa buraxmağı xahiş edib. Lakin məhkəmə onu həbsdə saxlayıb.

17 yanvar

'MeydanTV işi' üzrə həbs olunan jurnalistlərin şikayəti təmin edilməyib

"Meydan" televiziyası ilə əməkdaşlıq etdiyi bildirilən jurnalistlərdən Aynur Qəmbərova (Elgünəş) və Natiq Cavadlının həbs-qətimkan tədbirinin ev dustaqlığı ilə əvəzlənməsi ilə bağlı vəsatəti təmin olunmayıb.

Vəkil Elçin Sadıqovun verdiyi məlumata görə, müdafiə tərəfindən verilmiş vəsatət yanvarın 17-də Xətai rayon Məhkəməsində baxılıb.

Vəkil qeyd edib ki, məhkəmədə A.Qəmbərova jurnalist fəaliyyətinə görə həbs olunduğunu deyib və həbsini siyasi motivli adlandırıb.

E.Sadıqov bildirib ki, məhkəmə qərarından apellyasiya şikayəti veriləcək.

Ötən il dekabrın 8-də Xətai rayon Məhkəməsində "MeydanTV işi" ilə bağlı saxlanılanların məhkəmə prosesi keçirilib. Məhkəmə Aynur Elgünəş (Qənbərova), Aytac Tapdıq (Əhmədova), Natiq Cavadlı, Xəyalə Ağayeva, Aysel Umudova, Ramin Cəbrayilzadə (Deko) və Ülvi‌ Tahirov barəsində 4 aylıq həbs-qətimkan tədbiri seçib. Onlar Cinayət Məcəlləsinin 206.3.2-ci (qaçaqmalçılıq, bir qrup şəxs tərəfindən əlbir törədildikdə) maddəsi‌ ilə ittiham olunurlar.

Jurnalistlərin hamısı "qaçaqmalçılıq" ittihamını rədd edib və cinayət işini jurnalist fəaliyyətləri ilə əlaqələndiriblər. Onlar dekabrın 6-da saxlanmışdılar.

Xatırlatma

Ümumilikdə 2023-cü ilin noyabrından başlayaraq Azərbaycanda qruplar halında 30 civarında jurnalist, ictimai fəal qaçaqmalçılıq ittihamı ilə həbs edilib. Amma onların hamısı ittihamla razılaşmır, bunu peşə fəaliyyətləri və siyasi sifariş ilə izah edirlər. Sonradan onlardan bir çoxunun ittihamı ağırlaşdırılıb.

Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında 300-dən çox siyasi məhbus var.

Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslar ilə həbs edilmir. Onların deməsinə görə, həmin siyahılarda yer alanlar sırf törətdikləri əmələ görə məsuliyyətə cəlb ediliblər.

Həbsdə olan hüquq müdafiəçisi Anar Məmmədlinin səhhətindəki problemlərin getdikcə pisləşdiyi bildirilir.

Yanvarın 3-də 1 saylı Bakı İstintaq Təcridxanasında A.Məmmədli ilə görüşən vəkil Elçin Sadıqovun sözlərinə görə, onun başgicəllənmələri başlayıb, hüquq müdafiəçi baş və bel ağrılarından əziyyət çəkir.

O vurğulayır ki, səhhətindəki problemlərə baxmayaraq, hüquq müdafiəçisinin sözlərinə görə, ona adekvat tibbi yardım göstərilmir.

Müdafiə tərəfinin açıqlamasına Ədliyyə Nazirliyinin Baş Tibb İdarəsi və başqa uyğun qurumlardan münasibət öyrənmək mümkün olmayıb.

A.Məmmədlinin səhhəti ilə bağlı müdafiə tərəfi bundan öncədə bir neçə dəfə narahatlıqlarını ifadə ediblər.

İndiki və bundan əvvəlki həbsi

A.Məmmədli ötən il aprelin 29-da saxlanıb. Aprelin 30-da Xətai rayon Məhkəməsi onun barəsində həbs-qətimkan tədbiri seçib.

A.Məmmədli Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham olunur. O, ittihamı qəbul etmir.

Seçkilərin Monitorinqi və Demokratiyanın Tədrisi Mərkəzinin (SMDT) rəhbəri A.Məmmədli bundan əvvəl 2013-cü ilin sonlarında saxlanmışdı. O, həmin vaxt vergidən yayınma və başqa ittihamlar ilə 5 il 6 ay müddətinə həbs edilmişdi. Amma onda da ittihamları qəbul etməyib. Bir sıra yerli və beynəlxalq təşkilatlar onu siyasi məhbus kimi tanıyıblar. Məmmədli 2016-cı il martın 17-də əfv sərəncamı ilə azadlığa buraxılmışdı.

Qaçaqmalçılıq…

Ümumilikdə 2023-cü ilin noyabrından başlayaraq Azərbaycanda qruplar halında 30 civarında jurnalist, ictimai fəal qaçaqmalçılıq ittihamı ilə həbs edilib. Sonra onların bəzilərinin ittihamı daha bir neçə maddə ilə ağırlaşdırılıb. Söhbət külli miqdarda gəlir əldə etməklə qanunsuz sahibkarlıqdan, habelə mütəşəkkil dəstə ilə qaçaqmalçılıqdan, vergidən yayınmaqdan, sənəd saxtalaşdırma və saxta sənədlərdən istifadədən gedir. Amma onların hamısı ittihamla razılaşmır, bunu peşə fəaliyyətləri və siyasi sifariş ilə izah edirlər.

Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında təqribən 330 siyasi məhbus var. Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslar ilə həbs edilmir.

Azərbaycanda beynəlxalq terror təşkilatları ilə əlaqəli radikal dini-ekstremist qruplaşmanın zərərsizləşdirildiyi bildirilir.

Bu barədə Dövlət Təhlükəsizliyi Xidməti (DTX) və Daxili İşlər Nazirliyi (DİN) fevralın 3-də birgə məlumat yayıblar.

Açıqlamada iddia edilir ki, əməliyyat-istintaq tədbirləri ilə əvvəllər "Meşə qardaşları" adlı terror qruplaşmasında iştirak ittihamı ilə məhkum olunan şəxsin başqa şəxslərlə birlikdə Qusar rayonunda terror aktları hazırlamaları, yeraltı sığınacaqlar yaratmaları, bu sığınacaqları silah-sursat ilə təchiz etmələri təsbit olunub.

Vurğulandığına görə, qruplaşma üzvlərindən biri Qusar şəhərində gizləndiyi ünvanda xüsusi təyinatlı əməkdaşlara silahlı müqavimət göstərərək iki "RGO-78" əl qumbarası atıb, nəticədə xüsusitəyinatlılardan biri yaralanıb, həmin şəxs isə "zərərsizləşdirilib".

Habelə iddia edilir ki, Cibir kəndi yaxınlığında yerləşən meşəlik ərazidə gizlənən qanunsuz silahlı birləşmənin dörd üzvü silahlı müqavimət göstərərək partlayıcı vasitələri işə salarkən həlak olublar: "Aşkar edilmiş sığınacaqlara keçirilən baxış zamanı oradan partlayıcı qurğuların hazırlanması üçün nəzərdə tutulan torf, aseton, detonatorlar, məsafədən idarə edilə bilən partlayıcı mexanizmlər..., iki "Kalaşnikov" avtomatı, üç ov tüfəngi, patronlar və avtomat güllələri... müəyyən edilərək götürülüb".

Həmçinin bildirilir ki, görülmüş təxirəsalınmaz tədbirlərlə qruplaşma üzvü olan daha üç şəxs "silahlı müqavimət göstərərkən zərərsizləşdirilib".

Məlumata görə, ümumilikdə altı şəxs Cinayət Məcəlləsinin 28,214.2.1, 28,214.2.3, 28,214.2.6-cı (cinayətkar birlik halında odlu silahdan və silah qismində istifadə olunan predmetlərdən istifadə etməklə dini düşmənçilik,... zəminində terrorçuluğa hazırlıq) və digər maddələrlə ittiham edilərək həbs ediliblər.

Hələlik, rəsmi açıqlamaya haqlarında bəhs edilən həlak olan və tutulan şəxslərin yaxınlarından münasibət almaq mümkün olmayıb.

Fevralın 2-də İran prezidenti Məsud Pezeşkian Azərbaycan prezidentinin köməkçisi Hikmət Hacıyevi qəbul edib.

Bu barədə Azərbaycanın İrandakı səfirliyi "X" hesabında məlumat yayıb.

Hacıyev Peşeşkiandan əvvəl isə İran prezidentinin siyasi müşaviri Mehdi Sanai və xarici işlər naziri Abbas Araqçı ilə görüşüb.

Onun sosial şəbəkədə yazmasına görə, həmin şəxslərlə səmərəli müzakirələr aparıb.

"Azərbaycan-İran dostluq münasibətlərinin sülh şəraitində birgəyaşayış, daxili işlərə qarışmama və mehriban qonşuluq prinsipləri əsasında inkişaf etdirilməsi ilə bağlı fikir mübadiləsi aparıldı", - Hacıyev vurğulayıb.

Azərbaycan prezidentinin köməkçisi qeyd edib ki, müzakirələrdə qarşılıqlı etimadın artırılması tədbirlərini davam etdirmək barədə razılıq əldə olunub.

25 yanvar

Azərbaycan XİN yenə İrana etirazını bildirib

İranın Bakıdakı səfirliyinin müvəqqəti işlər vəkili Seyid Cəfər Ağayi Məryan Azərbaycan Xarici İşlər Nazirliyinə (XİN) çağırılıb.

Bu barədə Azərbaycan XİN-in yanvarın 25-də yaydığı məlumatda bildirilir.

"Görüş zamanı son zamanlar hökumət dairələrinə yaxın İran mətbu orqanlarında Azərbaycan əleyhinə, ölkə rəhbərliyinə qarşı açıq-aşkar şəkildə aparılan kampaniyaya etiraz bildirilib", - press-relizdə vurğulanır. "Xüsusilə, uzun fasilədən sonra Tehranda keçirilmiş Azərbaycan Respublikası ilə İran İslam Respublikası arasında iqtisadi, ticarət və humanitar sahələrdə əməkdaşlıq üzrə Dövlət Komissiyasının 16-cı iclasından və səmərəli rəsmi görüşlərdən sonra Azərbaycanın İrandakı səfirinin XİN-ə çağırılaraq əsassız şəkildə etiraz bildirilməsinin... anlaşılmazlıq yaratdığı qeyd olunub".

Bundan əvvəl, yanvarın 24-də Azərbaycanın Tehrandakı səfiri Əli Əlizadə İran XİN-ə dəvət olunub, burada nazirin köməkçisi və Avrasiya İdarəsinin baş direktoru Moctaba Dəmirçi ilə görüşüb. MEHR agentliyinin yaydığı məlumata görə, Dəmirçi Azərbaycanda təhsil alan bir sıra iranlı tələbələrə münasibətdə "mənfi" hərəkətlərə toxunub. O, bunu iki xalq arasındakı münasibətlər üçün zərərli adlandırıb, İran tərəfin etirazını bildirib və bu hərəkətlərin təşəbbüskarlarını cəzalandırmağa çağırıb.

Bugünlərdə bəzi yerli media orqanlarının məlumatına görə, Azərbaycanda təhsil alan 10-a yaxın iranlı tələbə "əxlaqa zidd" davranışlarla bağlı ölkədən deport olunub.

Lakin belə məlumatları Azərbaycanın rəsmi qurumları, hələlik, nə təsdiq, nə də inkar ediblər.

8 yanvar

Əliyev İran Təhlükəsizlik Şurasının katibini qəbul edib

Prezident İlham Əliyev yanvarın 8-də İranın Milli Təhlükəsizlik üzrə Ali Şurasının katibi Əli Əkbər Əhmədianı qəbul edib.

AZƏRTAC-ın məlumatına görə, İ.Əliyev deyib ki, Bakı regional məsələlərin region dövlətləri tərəfindən həll edilməsinin tərəfdarıdır və bu xüsusda regional əməkdaşlıq xarakteri daşıyan "3+3" formatının təşəbbüskarı da məhz Azərbaycan olub: "Regiondankənar xarici qüvvələrin regiona cəlb edilməsinin qəbuledilməz olduğu bir daha vurğulanıb".

"3+3" formatı dedikdə İran, Azərbaycan, Rusiya, Türkiyə, Ermənistan və Gürcüstanın əlaqələrindən bəhs edilir. Amma Gürcüstan həmin formatda görüşlərə qatılmır.

Habelə bildirildiyinə görə, görüşdə "Şimal-Cənub" nəqliyyat dəhlizinin inkişaf etdirilməsinin, bu baxımdan Azərbaycan, Rusiya və İran arasında üçtərəfli əməkdaşlıq formatının vacibliyinə toxunulub.

"Söhbət zamanı dostluq, qardaşlıq və mehriban qonşuluq prinsipi əsasında münasibətlərin bundan sonra da yüksələn xətt üzrə inkişaf edəcəyi qeyd olundu", - məlumatın sonunda bildirilir.

Bu görüş prezident İ.Əliyevin yerli televiziyalara müsahibəsində İranla bağlı bəzi tənqidi fikirlər səsləndirməsindən bir gün sonraya təsadüf edib. Amma görüşlə bağlı məlumatda prezidentin müsahibədə narahatlıqlarını bildirdiyi məsələlərdən bəhs edilmir.

Prezident İranla bağlı: '...Üzr istəyəcəklər, yoxsa yox?'

Prezident İlham Əliyev yanvarın 7-də yerli televiziya kanallarına müsahibəsində İranın Ali rəhbərinin Ərdəbil vilayəti üzrə nümayəndəsi Seyid Həsən Amelinin bu yaxınlarda Azərbaycanla bağlı açıqlamasına münasibət bildirib: "Burada sual ondadır ki, onu o vəzifəyə təyin edən adam buna necə münasibət göstərir? Axı o, özbaşına gəlib orada oturmur".

Prezident suallarına davam edib: "...Üzr istəyəcəklər, yoxsa yox?".

Prezidentin deməsinə görə, İranın xarici işlər nazirinin açıqlaması kifayət deyil, həmin şəxs ən azı vəzifəsindən kənarlaşdırılmalıdır və Azərbaycandan üzr istəməlidir.

Prezident Əliyevin bu fikirlərinə, hələlik, İranın rəsmi qurumlarının münasibəti bəlli deyil.

1 yanvar

Azərbaycan İrana etiraz bildirib

Yanvarın 1-də İranın Azərbaycandakı səfirliyinin müvəqqəti işlər vəkili Seyid Cəfər Ağayi Məryan Xarici İşlər Nazirliyinə çağırılıb.

Xarici İşlər Nazirliyinin (XİN) məlumatında bildirilir ki, dekabrın 29-da Ərdəbildə İranın Ali rəhbərinin Ərdəbil vilayəti üzrə nümayəndəsi Seyid Həsən Amelinin iştirak etdiyi tədbirdə Azərbaycana və onun dövlət başçısına qarşı səsləndirilən "təhqiramiz" ifadələrə görə İran tərəfinə sərt etiraz bildirilib.

"Bununla yanaşı, son zamanlar İranda əhali arasında açıq-aşkar şəkildə anti-Azərbaycan əhval-ruhiyyəsinin ciddi şəkildə qızışdırılması ilə əlaqədar narazılıq diqqətə çatdırılıb. İranda anti-Azərbaycan propaqandasının ikitərəfli münasibətlərin ruhuna, ölkələrimiz qarşısında qoyulan məqsəd və vəzifələrə uyğun gəlmədiyi qarşı tərəfə bildirilib", - məlumatda vurğulanıb.

+++

İran xarici işlər nazirinin köməkçisi və nazirliyin Avrasiya üzrə baş direktoru Müctəba Dəmirçili bu ölkənin Bakıdakı səfirliyinin müvəqqəti işlər vəkilinin Azərbaycan Xarici İşlər Nazirliyinə çağrılmasına münasibət bildirib.

Onun sözlərinə görə, İranın Ali rəhbərinin Ərdəbil vilayəti üzrə nümayəndəsi Seyid Həsən Amelinin Azərbaycana qarşı dedikləri İran hökumətinin mövqeyini əks etdirmir.

"İranın əsas siyasəti qonşu dövlətlərlə, xüsusilə Azərbaycan ilə dostluq əlaqələrini genişləndirməkdir", - Dəmirçili IRNA agentliyinə bildirib.

Xatırlatma

İran-Azərbaycan münasibətlərində əvvəllər də müəyyən narazılıq olmuşdu. Bundan əvvəlki illər hər iki ölkənin bir-birinin sərhədinə yaxın ərazidə hərbi təlimlər keçirməsi qarşılıqlı narazılıqlar doğurmuşdu. Hətta 2023-cü il yanvarın 27-də Azərbaycanın Tehrandakı səfirliyinə "Kalaşnikov" avtomatı ilə silahlı hücum da oldu. Hədisə nəticəsində səfirliyin bir əməkdaşının həlak olduğu, ikisinin isə xəsarət aldığı açıqlandı. Bundan sonra səfirliyin işçiləri Azərbaycana təxliyə edildi.

Ardınca da Azərbaycanda bir çox həbslər oldu. Saxlananlar ən müxtəlif ittihamlarla (ən çox da narkotiklə) üzləşsələr də, hökumətə yaxın media orqanlarında onlar "İran casusu" kimi təqdim edilirdilər. Hərçənd onların yaxınları bununla dini kəsimdən olan bir çox şəxslərin şərləndiyini dedilər. Amma xüsusilə son bir ildə hər iki tərəfin rəsmiləri bir-biriləri ilə əməkdaşlığa dair fikirlər səsləndirirlər. Ötən ilin iyulunda Azərbaycanın İrandakı səfirliyinin fəaliyyəti bərpa edilib.

Yanvarın 31-də Tbilisi şəhər Məhkəməsinin "Azel TV" saytının təsisçisi Əfqan Sadıqovun həbs müddətini 3 ay uzatdığı bildirilir.

Həyat yoldaşı Sevinc Sadıqovanın verdiyi məlumata görə, Ə.Sadıqov özü və vəkili məhkəmənin keçiriləcəyini son anda Sosial Ədalət Mərkəzindən öyrəniblər.

Xanımının əlavə etməsinə görə, müdafiə tərəfinin onun ev dustaqlığına və ya Gürcüstanda jurnalistlər qrupunun zaminliyi əvəzində buraxılması haqqında vəsatəti təmin olunmayıb.

Bununla belə, bundan öncə Gürcüstanın Sosial Ədalət Mərkəzi də bildirmişdi ki, Avropa İnsan Hüquqları Məhkəməsinin qərarına görə, Gürcüstan məhkəməsi bu iş üzrə yekun qərar qəbul edənə qədər Sadıqov Azərbaycana ekstradisiya edilməməlidir.

Ə.Sadıqov 2023-cü ilin dekabrında ailəsi ilə birlikdə Gürcüstana gəlib. Ötən ilin iyulunda o, Gürcüstandan Türkiyəyə buraxılmadığını söyləyib. Avqustda Azərbaycanın sorğusu ilə Ə.Sadıqov həbs edilib. Bakıda o, pul tələb etməkdə ittiham olunur və onun ekstradisiyası tələb olunur. Gürcüstan hakimiyyəti ona siyasi sığınacaq verməkdən imtina edib.

2024-cü il noyabrın 28-də Tbilisi şəhər Məhkəməsi Ə.Sadıqovun Azərbaycana ekstradisiyası haqqında qərar qəbul etmişdi.

Amma, hələlik, Ə.Sadıqovun həbsinin uzadılması ilə bağlı xanımının dediklərini Tbilisi şəhər Məhkəməsinin özündən dəqiqləşdirmək mümkün olmayıb.

Xatırlatma

"Azel TV" saytının təsisçisi və baş redaktoru Ə.Sadıqov bundan əvvəl 2016-cı il noyabrın 22-də Azərbaycanda saxlanmışdı. Ona Cinayət Məcəlləsinin 127.2.3-cü (xuliqanlıq niyyəti ilə təhlükəli üsulla sağlamlığa qəsdən az ağır ziyan vurma) maddəsi ilə ittiham irəli sürülmüşdü. O, icra hakimiyyətində bir qadına xəsarət yetirməkdə ittiham edilirdi. Ancaq o, ittihamı qəbul etmir, işi qurama sayırdı. 2017-ci il yanvarın 12-də Cəlilabad rayon Məhkəməsi onu 2 il yarım müddətinə azadlıqdan məhrum edib. Həmin ilin noyabrında isə Ali Məhkəmə Ə.Sadıqovun cəza müddətini 2 il yarımdan 1 il yarımadək azaldıb. O, 2018-ci il mayın 23-də azadlığa çıxıb.

Azadlığa çıxdıqdan sonra da o, polisin qanuni tələbinə əməl etməməkdə günahlandırılaraq 30 sutka həbs cəzası almışdı. Ə.Sadıqov onda da ittihamı qəbul etmirdi.

İtaliyanın şəxsi məlumatların qorunması üzrə tənzimləyici qurumu (GPDP) Çinin "DeepSeek-R1" süni intellekt tətbiqinin ölkədə "Apple" və "Google" onlayn mağazalarından çıxarıldığını açıqlayıb.

GPDP bildirib ki, "DeepSeek"dən şəxsi məlumatların istifadəsi ilə bağlı suallarına cavab tələb edib. Qurum hansı şəxsi məlumatların hansı məqsədlə toplandığını, onların Çində saxlanıb-saxlanılmadığını öyrənmək istəyib. Lakin qarşı tərəf GPDP-nin suallarına cavab verməyib.

Tənzimləyici qurum Çin neyron şəbəkəsinin tərtibatçılarına italiyalı müştərilərin məlumatlarını emal etməmək və Avropa qanunvericiliyinə uyğunluq tələbi ilə sorğu göndərib. Çin şirkətlərinin cavabı o olub ki, şirkət Avropada fəaliyyət göstərmir və Avropa qanunlarına tabe deyil. GPDP bu cavabı əsassız sayıb və mümkün qanun pozuntuları ilə bağlı araşdırmaya başlayıb.

"Il Sole 24 Ore" nəşri yazır ki, GPDP-nin tələbindən sonra "DeepSeek" artıq tətbiqini İtaliya bazarından çıxarıb, lakin internet saytı vasitəsilə fəaliyyətini davam etdirir.

"DeepSeek-R1" İtaliya bazarından çıxarılmazdan əvvəl ölkədə ən çox yüklənən applikasiya olub.

Buna da bax:

Tramp 'DeepSeek'in yüksəlişini ABŞ üçün 'xəbərdarlıq siqnalı' adlandırıb

Ağcabədi rayonunda parlayış nəticəsində ölən və yaralananların olduğu deyilir.

Baş Prokurorluğun Mətbuat xidmətindən bildirilib ki, yanvarın 31-də saat 12 radələrində Ağcabədi rayonunun Hindarx qəsəbəsindəki evlərdən birində beş nəfərin ölməsi, iki nəfərin yaralanması ilə nəticələnən partlayışa dair məlumat alıblar.

Yerli mediada yer alan iddialara görə, hadisə əl qumbarasının partlaması nəticəsində baş verib.

Faktla bağlı Ağcabədi rayon Prokurorluğunda Cinayət Məcəlləsinin 124.2-ci (ehtiyatsızlıqdan iki və ya daha çox adam öldürmə) və 228.1-ci (qanunsuz olaraq döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə) maddələri ilə cinayət işi başlanaraq ibtidai istintaq aparılır.

Nyu-Yorkun federal məhkəməsi keçmiş demokrat senator Bob Menendesi 11 il həbs cəzasına məhkum edib. Keçmiş senator qızıl və nağd pulla rüşvət almaqda və Misirin xeyrinə qeyri-qanuni lobbiçilikdə təqsirli bilinib.

20 ildir Nyu-Cersi ştatından senator olmuş və bir müddət Senatın Xarici Əlaqələr Komitəsinə rəhbərlik etmiş Menendes keçən ilin yayında andlılar məhkəməsi onu təqsirli bildikdən sonra istefaya getməyə məcbur olub.

Məhkəmə zalında keçmiş senator göz yaşlarını saxlaya bilməyib, hakimdən güzəştə getməsini xahiş edib. Menendes ailəsinin dəstəyindən başqa həyatda sahib olduğu hər şeyi itirdiyini deyib.

Hakim hökmü elan edərkən qeyd edib ki, Menendesin yaxşı adı, reputasiyası və gücü olsa da, o, bütün bunlardan öz şəxsi məqsədləri, varlanmaq üçün istifadə edib. Təhqiqatın nəticəsində görə, senator Nyu-Cersidən olan üç iş adamından onların maraqlarının müdafiəsi qarşılığında rüşvət alıb. Onun Misir hökumətindən bu ölkənin maraqları ilə bağlı Senatda lobbiçilik, Birləşmiş Ştatların Qahirəyə sərfəli hərbi yardım müqavilələrini təmin etməsi üçün rüşvət aldığı iddia olunur.

Menendesin evində axtarış zamanı Federal Təhlükəsizlik Bürosunun (FBI) əməkdaşları təxminən 500 min dollar pul və qızıl külçələr tapıblar. Sabiq senator təqsirsiz olduğunu israr edir və hökmdən apellyasiya şikayəti vermək niyyətindədir.

Uzun müddətdir demokrat olaraq hazırkı prezident Donald Trampın əleyhdarı olsa da, Menendes öz bəyanatında əvvəllər Trampın Nyu-York məhkəmələrinin siyasiləşdirilməsi ilə bağlı fikirləri ilə razılaşıb və prezidentin məhkəmə sisteminə inamı bərpa edəcəyinə ümidini bildirib.

BMT-nin baş katibi Antonio Quterreş Qəzzada çalışmış ABŞ həkimləri ilə görüşdükdən sonra təcili müalicə üçün 2 min 500 uşağın Qəzzadan dərhal təxliyə edilməsi ilə bağlı çağırış edib. Quterreş yanvarın 30-da amerikalı həkimlərlə görüşündən dərindən təsirləndiyini bildirib. Görüşdən sonra X sosial mediasında paylaşım edərək "2 min 500 uşaq dərhal təxliyə edilməli, onların ailələrinə və icmalarına qayıtmaq hüququ təmin olunmalıdır", – deyə vurğulayıb.

Həkimlər görüşdə bu uşaqların qarşıdakı həftələrdə ölüm riski ilə üz-üzə olduğunu bildiriblər.

"Reuters" xəbər verir ki, Quterreşlə görüşən bu dörd həkim İsrail və HƏMAS (ABŞ və Aİ tərəfindən terrorçu qrup kimi tanınır) arasında 15 ay davam edən müharibə zamanı müxtəlif vaxtlarda Qəzzada könüllü fəaliyyət göstəriblər.

İsrail və HƏMAS arasında atəşkəsin qüvvəyə minməsindən bir neçə gün əvvəl Ümumdünya Səhiyyə Təşkilatı (ÜST) 12 mindən çox xəstənin tibbi təxliyə gözlədiyini bəyan etmişdi.

"Ən azı 2 min 500 uşaq qarşıdakı bir neçə həftə ərzində ölüm təhlükəsi altındadır. Bəziləri artıq bu dəqiqə dünyasını dəyişir. Bəziləri sabah öləcək. Bəziləri isə ondan sonrakı gün", - kaliforniyalı cərrah Ferouz Sidhva bildirib.

Stenford Universiteti Xəstəxanasının təcili yardım həkimi Ayeşa Xan isə Qəzzada olarkən burada protez və reabilitasiya imkanları olmayan çox sayda amputasiya edilmiş uşaqlarla qarşılaşdığını bildirib.

Qəzzada könüllü olmuş çikaqolu təcili yardım həkimi isə jurnalistlərə deyib ki, atəşkəs razılaşmasına əsasən, tibbi təxliyələr üçün mexanizm yaradılmalı idi: "Lakin biz hələ də həmin prosesin necə işlədiyini görməmişik".

Həkim uşaqların çıxarılması üçün heç bir rəsmi prosesin olmadığını da əlavə edib: "Bəs onlar geri qayıda biləcəklərmi? Hazırda Rəfah sərhəd-keçid məntəqəsinin yalnız çıxış üçün açılması müzakirə olunur, lakin bu, qayıtmaq hüququ olmadan çıxış deməkdir".

Yanvarın əvvəlində, atəşkəsdən öncə ÜST müharibənin başladığı 2023-cü ilin oktyabrından bəri onun dəstəyi ilə 5 min 383 xəstənin təxliyə olunduğunu açıqlamışdı. Bu xəstələrin əksəriyyəti ilk yeddi ay ərzində, Misirlə Qəzza arasındakı Rəfah sərhəd-keçid məntəqəsinin bağlanmasından əvvəl çıxarıla bilmişdi.

Xatırlatma

İsrail və HƏMAS arasında müharibə 2023-cü il oktyabrın 7-də HƏMAS silahlılarının İsrailin cənubundakı yaşayış məntəqələrinə hücumu ilə başlayıb. Təxminən 1 min 200 nəfər, əsasən, dinc sakinlər öldürülüb, 251 nəfər girov götürülərək Qəzzaya aparılıb. İsrail buna cavab olaraq Fələstin anklavında dağıdıcı müharibəyə başlayıb. HƏMAS-ın nəzarətindəki Qəzza Səhiyyə Nazirliyinin məlumatına görə, bu müharibə 46 mindən çox insanın ölümünə səbəb olub. İsrailin hərbi əməliyyatları nəticəsində Qəzza kütləvi dağıntılarla üzləşib və 2.3 milyon sakininin əksəriyyəti evlərini tərk etmək məcburiyyətində qalıb.

2025-ci il yanvarın 15-də tərəflər arasında atəşkəs əldə olunub. Bir neçə mərhələdən ibarət olan razılaşma HƏMAS-ın Qəzzadakı israilli girovları azad etməsi, 2 minə yaxın fələstinli məhbusun İsrail həbsxanalarından buraxılması, fələstinlilərin öz evlərinə qayıtması, HƏMAS tərəfindən idarə olunan anklava humanitar yardımın daxil olması kimi müddəaları ehtiva edir.

İsveç mediasının yaydığı xəbərə görə, 38 yaşlı iraqlı qaçqın Salvan Momika yanvarın 29-u axşam saatlarında Stokholm şəhərinin Södertelye bölgəsindəki mənzilində güllələnib.

Stokholm polisi verdiyi açıqlamada hadisə ilə bağlı beş nəfərin saxlanıldığını bildirib.

İsveçdə yaşayan Momika 2023-cü ildə bir neçə dəfə antiislam aksiyası təşkil edib. Bu aksiyalardan birində o, Stokholm mərkəzi məscidinin qarşısında İslamın müqəddəs kitabını yandırıb. Bu hadisə Müsəlman ölkələrində ciddi qəzəbə səbəb olub. İsveçin Bağdaddakı səfirliyi iki dəfə hücuma məruz qalıb, İsveç səfiri diplomatik böhran fonunda ölkədən çıxarılıb.

2023-cü ilin avqustunda İsveçin təhlükəsizlik xidməti Quranın yandırılmasından sonra ölkənin prioritet hədəfə çevrildiyini əsas gətirərək terror təhlükəsi səviyyəsini beş ballıq şkala üzrə dördə qaldırıb.

İsveç hökuməti bu hərəkətləri pisləsə də, ölkədə ifadə və toplaşmaq azadlığının konstitusiya ilə qorunduğunu vurğulayıb. Bununla belə, isveçli prokurorlar kontekstdən və hadisə zamanı verilən açıqlamalardan asılı olaraq, belə hərəkətlərin "etnik qrupa qarşı nifrət təbliğatı" kimi də qiymətləndirilə biləcəyini bəyan edib.

S.Momikanın işi digər bir etirazçı Salvan Nacem ilə birgə məhkəmədə idi və yanvarın 30-da məhkəmə qərar çıxarmalı idi. Stokholm məhkəməsi açıqlama yayaraq bildirib ki, məhkəmə hökmü təqsirləndirilən şəxslərdən birinin ölməsi səbəbi ilə təxirə salıb.

Vaşinqton şəhər hava limanı yaxınlığında, Potomak çayı üzərində sərnişin təyyarəsinin hərbi helikopterlə toqquşması ilə əlaqədar ərazidə genişmiqyaslı axtarış-xilasetmə əməliyyatı aparılır.

ABŞ Federal Aviasiya Administrasiyası (FAA) hadisənin yerli vaxtla saat 21:00 radələrində baş verdiyini bildirib.

"CBS News" qəza yerində işləyən polisə istinadən xəbər verir ki, sudan 18 cəsəd çıxarılıb. Mənbənin sözlərinə görə, fəlakət nəticəsində sağ qalan hələ tapılmayıb.

Ronald Reyqan Milli Hava Limanından bütün qalxış və enişlər dayandırılıb.

Helikopterlə toqquşan təyyarənin "Bombardier" olduğunu açıqlayan FAA əlavə edib ki, təyyarə Kanzas ştatının Uiçito şəhərindən havaya qalxıb. O, eniş üçün yaxınlaşan zaman "Sikorsky H-60" helikopteri ilə havada toqquşub.

"American Airlines"in məlumatına görə, təyyarədə 60 sərnişin və dörd heyət üzvü olub.

"Sikorsky H-60 (Blackhawk)" helikopterində isə üç hərbçinin olduğu bildirilir.

Təyyarədə dünya çempionları da olub

Vaşinqtonda Potomak çayı üzərində sərnişin təyyarəsi ilə hərbi helikopterin toqquşması nəticəsində ölənlər arasında fiqurlu konkisürmə üzrə rusiyalı dünya çempionları Vadim Naumov və həyat yoldaşı Yevgeniya Şişkovanın da olduğu bildirilir.

1994-cü il Dünya Çempionatında cütlükdə qızıl medal qazanan Naumov və Şişkova idmançı karyeralarını bitirdikdən sonra Birləşmiş Ştatlara köçərək məşqçi fəaliyyətinə başlayıblar.

Onların 23 yaşlı oğlu Maksim ABŞ vətəndaşıdır və beynəlxalq yarışlarda Birləşmiş Ştatları təmsil edir. O, 2020-ci ildə gənclər arasında ABŞ çempionu olub.

"Gürcü arzusu" partiyası Avropa Şurası Parlament Assambleyasında (AŞPA) fəaliyyətini dayandırıb. Bu, AŞPA-nın Gürcüstanı yeni parlament seçkilərinin tarixini təyin etməyə çağıran qətnaməni böyük səs çoxluğu ilə qəbul etməsindən sonra baş verib. Sözügedən qətnamə 114-13 səs çoxluğu ilə qəbul edilib. Gürcüstanın AŞPA-dakı nümayəndə heyətinin rəhbəri Tea Tsulukiani qətnamənin şərtlərini "qəbuledilməz, ədalətsiz və əsassız" adlandırıb.

Qətnamə Gürcüstan hakimiyyətini aprel ayına qədər yeni parlament seçkilərinin tarixini təyin etməyə, bütün siyasi məhbusları azadlığa buraxmağa və mübahisəli qanunlara yenidən baxmağa çağırır. Bu tələblər Tbilisidə və ölkənin digər bölgələrində Avropayönümlü etiraz aksiyalarını davam etdirən nümayişçilərin çağırışları ilə üst-üstə düşür.

"News Georgia" nəşrinin məlumatına görə, Tsulukiani qətnamənin yeni seçkilər keçirilməsi tələbini "Gürcüstanın suverenliyinin pozulması və 1 milyon 120 mindən çox "Gürcü arzusu" seçicisinin iradəsinin nəzərə alınmaması" kimi dəyərləndirib və bunu "qətiyyən qəbuledilməz" adlandırıb.

"Tərəfimizdən bu tələbi qəbul etmək seçicilərimizə və dolayısı ilə cəmiyyətimizin böyük hissəsinə xəyanət etmək olardı. Yuxarıda qeyd olunanlara əsasən, biz – Strasburqda olan Gürcüstan parlament nümayəndə heyətinin üzvləri bugündən etibarən AŞPA-dakı fəaliyyətimizi dayandırırıq", - Tsulukiani yanvarın 29-da bildirib.

Xatırlatma

"Gürcü arzusu" ötən ay keçmiş futbolçu və sağçı populist Mixeil Kavelaşvilinin namizədliyini prezident postuna irəli sürüb və daha sonra onu hakimiyyətə gətirib. Bu addım 2024-cü ilin oktyabrında keçirilmiş parlament seçkilərinin azad və ədalətli olmadığı ilə bağlı iddialara baxmayaraq atılıb.

Partiya seçkilərdə qalib gəldiyini iddia etsə də, Avropada Təhlükəsizlik və Əməkdaşlıq Təşkilatı (ATƏT) bu prosesin səslərin satın alınması, ikiqat səsvermə, fiziki zorakılıq və təzyiqlərlə müşayiət olunduğunu bildirib.

Buna cavab olaraq, ölkədə antihökumət etirazları başlayıb. Noyabrda hakimiyyətin Gürcüstanın Avropa İttifaqına qoşulması ilə bağlı danışıqları təxirə salmaq qərarı bu etirazları daha da gücləndirib.

Hakimiyyət nümayişlərə sərt şəkildə müdaxilə edib, yüzlərlə insan həbs olunub, həmçinin etirazçılar Çin istehsalı olan üztanıma kameraları vasitəsilə izlənilib.

Rusiya prezidenti Vladimir Putin ukraynalı həmkarı Volodimir Zelenskini "qeyri-legitim" adlandıraraq onunla birbaşa sülh danışıqlarını istisna edib. Zelenski isə buna cavab olaraq Putini təxminən üç ildir sürən münaqişənin həlli üçün danışıqlardan qorxmaqda ittiham edib.

"İstənilən şəxslə danışıqlar aparmaq olar, lakin onun [Zelenskinin] qeyri-legitimliyi səbəbindən nəsə imzalamaq hüququ yoxdur", – Putin yanvarın 28-də "Rossiya 1" telekanalına bildirib.

Onun sözlərinə görə, əgər Zelenski danışıqlarda iştirak edərsə, birbaşa üz-üzə görüşmək əvəzinə, xüsusi nümayəndələr ayıracaq.

Putin artıq bir neçə dəfə bəyan edib ki, o, Zelenskini legitim lider saymır, çünki "onun beşillik prezidentlik müddəti keçən il, mayın 20-də başa çatıb".

2024-cü il martın 31-də Ukraynada seçkilər keçirilməli idi, lakin Rusiyanın Ukraynaya qarşı genişmiqyaslı işğalçı müharibəsinə görə ölkədə hərbi vəziyyət davam etdiyi üçün seçkilər təxirə salınıb.

"Bu gün Putin bir daha təsdiq etdi ki, o, danışıqlardan, güclü liderlərdən qorxur və müharibəni uzatmaq üçün əlindən gələni edir", – Zelenski sosial mediada paylaşımında bildirib.

İsrail baş nazirinin X sosial şəbəkəsindəki rəsmi hesabında bildirilib ki, ABŞ prezidenti Donald Tramp Benyamin Netanyahunu fevralım 4-də Ağ evdə görüşə dəvət edib.

Məlumatda vurğulanıb ki, Netanyahu Trampın ikinci prezidentlik müddətində Ağ evə dəvət edilən ilk xarici liderdir.

"Guardian" xəbər verir ki, dəvətlə bağlı prezident Tramp məktub göndərib. Məktubda bildirilib ki, görüşün məqsədi "İsrail və onun qonşularına necə sülh gətirə biləcəyimizi və ortaq düşmənlərimizlə mübarizə səylərini müzakirə etmək" ilə bağlıdır.

Prezident Tramp daha əvvəl jurnalistlərə açıqlamasında deyib ki, o, Qəzzadakı atəşkəsin davam edəcəyinə əmin deyil.

Atəşkəs şərtlərinə görə, İsrail və HƏMAS tezliklə daha uzunmüddətli sülh danışıqlarına başlamalıdır. Lakin çoxları bunun uğursuzluğundan və 15 aydan çox davam edən döyüşlərdən sonra əldə olunan atəşkəsin müvəqqəti olacağından narahatdır.

Tramp müəyyən silahların İsrailə tədarükü ilə bağlı Bayden administrasiyasının qadağasını ləğv edib.

Ukraynanın müdafiə naziri Rustem Umerova qarşı cinayət işi açılıb. Bu, Müdafiə Satınalmaları Agentliyinin (AOZ) rəhbərinin müqaviləsinin uzadılması əmrinə Umerovun əməl etməməsi ilə bağlıdır.

Ukraynanın Milli Antikorrupsiya Bürosu (NABU) yanvarın 28-də AzadlıqRadiosuna bildirib ki, müdafiə naziri Umerovun öz səlahiyyətlərindən və ya rəsmi mövqeyindən sui-istifadə etməsi ehtimalı üzrə istintaq başladıb. Qeyd olunub ki, Umerov AOZ-un rəhbəri Marina Bezrukovanın müqaviləsini yeniləməkdən imtina edib və agentliyin Müşahidə Şurasının iki üzvünü vəzifədən çıxarıb.

NABU-nun bildirdiyinə görə, Umerovla bağlı istintaq qeyri-hökumət təşkilatı olan Antikorrupsiya Fəaliyyəti Mərkəzi (AntAC) tərəfindən verilmiş şikayət əsasında başladılıb.

Umerovla bağlı istintaq xəbəri Ukrayna Nazirlər Kabineti Müdafiə Nazirliyinin satınalma əməliyyatlarında aparılan dəyişikliklər çərçivəsində müdafiə nazirinin müavini Dmitro Klimenkovu vəzifəsindən azad etməsindən bir neçə saat sonra yayılıb.

Bu addımlar Ukraynanın üç ildir davam edən Rusiya işğalına qarşı mübarizəsində həlledici rol oynayan bir sektorda idarəetmə islahatlarına olan təcili ehtiyacı göstərir.

NABU bəyanatında bildirib ki, səlahiyyətlərdən və ya rəsmi mövqedən sui-istifadə ittihamı təsdiqlənərsə, bu, 3 ildən 6 ilədək azadlıqdan məhrumetmə, eləcə də cərimələr və digər sanksiyalarla cəzalandırıla bilər.

Rusiyanın müxtəlif regionlarına dron hücumları edilib

Rusiya hökumət rəsmiləri Smolensk, Nijni Novqorod, Tver, Kursk, Leninqrad və Bryansk vilayətlərində yanvarın 28-dən 29-na keçən gecə Ukrayna dronlarının hücumlarını qeydə aldıqlarını açıqlayıblar.

"Smolensk vilayətinin müxtəlif ərazilərində mülki obyektlər dronlar tərəfindən genişmiqyaslı hücuma məruz qalır", – vilayətin qubernatoru Vasili Anoxin "Telegram" kanalında yazıb. O bildirib ki, dronlardan biri nüvə enerji obyektinə hücum etməyə cəhd göstərərkən vurulub. Smolensk Atom Elektrik Stansiyası vilayətin əsas enerji istehsal müəssisələrindən biridir və Smolensk şəhərindən təxminən 100 kilometr məsafədə yerləşir.

Nijni Novqorod vilayətinin qubernatoru Qleb Nikitin də bir dronun Kstov sənaye zonasında yerləşən yanacaq və enerji kompleksinin ərazisinə düşdüyünü bildirib.

Ukrayna sərhədi yaxınlığında yerləşən Bryansk və Moskvaya yaxın Tver vilayətlərinin qubernatorları da dron hücumlarının olduğunu bildiriblər, lakin onların sözlərinə görə, tələfat və dağıntı qeydə alınmayıb.

Təhlükəsizlik səbəbi ilə Kazan və Sankt-Peterburq hava limanlarında müvəqqəti uçuş məhdudiyyətləri tətbiq edilib.

Rusiya Müdafiə Nazirliyi gecə saatlarında bir neçə region üzərində ümumilikdə 104 Ukrayna dronunun vurulduğunu xəbər verib.

Hər iki tərəf son aylarda pilotsuz uçuş aparatlarından (PUA) istifadəni artırıb və tez-tez düşmənin enerji infrastrukturunu hədəf alır.

Fransanın xarici işlər naziri Jan Noel Baro "Sud Radio"ya müsahibəsində deyib ki, Paris Birləşmiş Ştatlar prezidenti Donald Trampın Danimarka ərazisini ilhaq etməklə bağlı bəyanatlarına cavab olaraq Qrenlandiyaya qoşun göndərilməsi məsələsini Kopenhagenlə müzakirə edib.

Baro Fransanın Danimarka ilə qoşun yerləşdirməni müzakirə etməyə başladığını, lakin bu ideyanın reallaşmasının "Danimarkanın arzusu" olmadığını əlavə edib.

Baronun bu açıqlaması Danimarka baş naziri Mette Frederiksenin müttəfiqlərdən dəstək almaq üçün Avropa paytaxtlarına səfərlərinin baş tutduğu vaxta təsadüf edir.

Tramp Danimarkanın nəzarətində olan nəhəng Arktika adasına sahib çıxmaq üçün mümkün imkanlardan istifadə edəcəyini bir neçə dəfə bildirib. Trampın fikrincə, Qrenlandiyaya nəzarət ABŞ-nin təhlükəsizliyi üçün vacibdir.

Danimarka baş naziri Frederiksen isə Almaniya kansleri Olaf Şolts və Fransa prezidenti Emmanuel Makronla danışmaq üçün yanvarın 28-də səhər Berlin və Parisdə olub. Eyni zamanda o, Brüsseldə NATO-nun baş katibi Mark Rütte ilə görüşməyə hazırlaşır.

Bir neçə gün əvvəl isə Danimarka hökumət başçısı İsveç, Norveç və Finlandiya liderləri ilə görüşüb.

"Danimarka köməyə çağırsa, Fransa orada olacaq. Avropa sərhədləri istər şimal, istər cənub, istər şərq və qərb olsun, suverendir... heç kim sərhədlərimizi poza bilməz", - Fransanın baş diplomatı müsahibəsində vurğulayıb.

Baro həmçinin bildirib ki, Avropa İttifaqının xarici işlər nazirlərinin yanvarın 27-də Brüsseldə keçirilən görüşü zamanı onlar Kopenhagenə "çox güclü dəstək" ifadə ediblər və lazım gələrsə, "qoşunların göndərilməsini nəzərdən keçirməyə hazırdırlar".

Bununla belə, Fransa xarici işlər naziri Birləşmiş Ştatların Qrenlandiyanı işğal edəcəyinə inanmadığını söyləyib. "Amerikalılar Qrenlandiyanı işğal edəcəkmi? Yox, bu baş verməyəcək, heç kimin Avropa İttifaqı ilə münaqişəyə girmək marağı yoxdur", - fransalı nazir sonda deyib.

Bu gün, yanvarın 28-də Rusiya Federasiyasının Bakıdakı fövqəladə və səlahiyyətli səfiri Mixail Yevdokimov Azərbaycan Xarici İşlər Nazirliyinə (XİN) dəvət olunub.

Azərbaycan XİN bildirir ki, görüş zamanı Rusiya mətbuatında, eləcə də bəzi rəsmi dairələri tərəfindən "dezinformasiya xarakterli", onları "hədəf alan" yazıların dərc olunmasının anlaşılmazlıq yaratdığı, iki ölkə arasında 3 il əvvəl imzalanan "Müttəfiqlik qarşılıqlı fəaliyyəti haqqında Bəyannamə"nin məzmun və ruhuna zidd olduğu diqqətə çatdırılıb: "AZAL-a məxsus təyyarənin qəzaya uğraması ilə bağlı ilkin təhqiqatın nəticələrinin məlum olduğu, istintaqın yekunlaşdırılması üçün iş aparıldığı, qəza ilə bağlı Rusiyadan gözləntilərimizin açıq şəkildə bəyan edildiyi xatırlanıb".

Açıqlamaya görə, yerli mətbu orqanında "Rus evi" ilə bağlı məlumata gəldikdə, bunun rəsmi mövqe olmadığı, bu kimi təşkilatların fəaliyyətinin qarşılılıq prinsipinə əsaslandığı və qanunvericiliyin tələblərinə uyğun aparılmasının vacib olduğu bildirilib.

Azərbaycan səfiri Rusiya XİN-ə çağrılıb

Rusiya Xarici İşlər Nazirliyi (XİN) bildirib ki, yanvarın 27-də Azərbaycanın fövqəladə və səlahiyyətli səfiri Rəhman Mustafayevi bu quruma dəvət ediblər və nazir müavini Mixail Qaluzin onunla görüşüb.

XİN-in məlumatına görə, görüş zamanı nazir müavini "Rusiya və Azərbaycan arasında strateji tərəfdaşlıq və müttəfiqlik ruhunda əlaqələrin qurulmasının mütləq əhəmiyyətini vurğulayıb".

Açıqlamaya görə, görüşdə habelə "Azərbaycan mətbuatında son vaxtlar Rusiya əleyhinə olan silsilə yazılar, eləcə də Bakıda Rus Evinə qarşı aparılan dezinformasiya kampaniyası ilə bağlı təəccüb ifadə olunub".

Bugünlərdə hakimiyyətyönlü "Baku TV" peyk telekanalında Bakıda yerləşən "Rus Evi" mədəniyyət mərkəzi ilə bağlı reportaj efirə gedib. "Rus Evi, yoxsa daha çox rus kəşfiyyatı evi" adlı süjetdə bu qurumun fəaliyyəti ilə bağlı bir sıra iddialar yer alıb. Rusiya XİN bildirib ki, Mixail Qaluzin bu iddiaları "tamamilə əsassız" adlandırıb.

Görüşdə həmçinin 2024-cü il dekabrın 25-də Qazaxıstanın Aktau şəhəri yaxınlığında AZAL-a məxsus sərnişin təyyarəsinin qəzaya uğraması da müzakirə olunub. "Faciənin bütün detallarının aydınlaşdırılması üçün rəsmi araşdırmanın başa çatdırılması və nəticələrinin dərc edilməsinin zəruriliyi vurğulanıb", -Rusiya XİN bildirib.

Xatırlatma

Dekabrın 25-də Bakı-Qroznı marşrutu ilə uçan AZAL təyyarəsi Aktauda qəza enişi edib. Təyyarədəki 67 nəfərdən 38-i həlak olub, 29 nəfər sağ qalıb.

Azərbaycan prezidenti İlham Əliyev yerli mediaya deyib ki, sərnişin təyyarəsi Rusiyanın hava məkanında kənar fiziki-texniki müdaxiləyə məruz qalıb, idarəetməni tam itirib, Qazaxıstanın Aktau şəhərinə yönləndirilib və yalnız pilotların şücaəti, peşəkarlığı sayəsində qəza enişi edə bilib.

Rusiya prezidenti Vladimir Putin azərbaycanlı həmkarına zəng edərək başsağlığı verib və hadisənin Rusiya səmasında baş verdiyinə görə üzr istəyib. Ancaq Rusiya hadisə ilə bağlı məsuliyyəti öz üzərinə götürməyib.

Azərbaycan həm məsuliyyətin müəyyən olunması və həm də kompensasiya ödənilməsini tələb edir.